Leys størv

Føroya Tele leitar eftir einum strategiskt sterkum KT-stjóra at leiða og menna KT-økið hjá samtakinum. Kunningartøkni er hornasteinur undir kjarnuvirkseminum hjá Føroya Tele. Í starvinum fært tú ábyrgdina av strategisku ætlanunum á KT-økinum og fert at standa á odda fyri stórum KT-verkætlanum.

Um starvið

Sum KT-stjóri fært tú ein serligan møguleika at mynda kósina fyri KT og talgilda menning í eini fyritøku, ið hevur stóran týdning fyri føroyska samfelagið.

Ein týðandi leiklutur verður at nýhugsa og dagføra kjarnuskipanir til framtíðartørvin, og sum KT-stjóri fert tú at standa fyri menningini av nýskapandi loysnum, ið knýta starvsfólk, kundar, teleskipanir, fíggjarskipanir og stýringarskipanir saman.

Tú verður partur av leiðslutoyminum hjá Føroya Tele og vísir beinleiðis til samtaksstjóran. Starvið inniber tætt samstarv við aðrar deildir og dótturfeløg í samtakinum.   

Ábyrgdarøki

Sum KT-stjóri stendur tú á odda fyri KT-deildini, ið er eitt toymi við 16 stinnum KT-arkitektum, KT-mennarum og skipanarumsitarum. Deildin mennir og umsitur skipanir, ið stuðla undir virksemið í øllum Føroya Tele-samtakinum.   

Tú fært m.a. ábyrgd av:

·       at leggja strategi og útinna strategisku ætlanirnar á KT-økinum fyri alt samtakið

·       yvirskipaðu leiðsluni av stórum KT-verkætlanum, eitt nú umlegging og skifti av        kjarnuskipanum

·       at KT-økið sum heild er væl rikið og livir upp til galdandi krøv til rakstrardygd og trygd

·       at tryggja gott samstarv og úrslit tvørtur um deildir og dótturfeløg í samtakinum

·       at raðfesta trivnað, samstarv og fakliga menning hjá starvsfólkum á økinum

Førleikar

KT-stjórin hevur evstu ábyrgd av at tryggja menning og rakstur av KT-økinum í samtakinum. Vit vænta tí, at tú hevur viðkomandi útbúgving og starvsroyndir innan KT, umframt royndir at leiða deildir ella størri verkætlanir. Eisini hevur tað týdning, at tú hevur:

·       sterka strategiska fatan og førleikar at raðfesta og arbeiða í eini fjøltáttaðari fyritøku

·       holla vitan um tøkni, produkt og veitarar

·       sterkar analytiskar eginleikar og góða praktiska fatan av tørvi hjá brúkarum og        fyritøku

·       eina tilgongd til uppgávur og avbjóðingar, sum leggur dent á nýhugsan og úrslit

·       opið sinn og ert ágrýtin

Setanarviðurskifti  

Arbeiðsstaður er í høvuðssætinum hjá Føroya Tele í Hoyvík, og løn verður ásett eftir avtalu.

Ljóðar hetta sum starv fyri teg, ert tú vælkomin at senda okkum umsókn við lívsrensli og viðkomandi skjølum í seinasta lagi sunnudagin 12. januar 2025. Starvið verður sett eftir nærri avtalu.   

Hevur tú spurningar viðvíkjandi starvinum, ert tú vælkomin at seta teg í samband við Kristian R. Davidsen, samtaksstjóra, á krd@ft.fo. Tú kanst eisini seta teg í samband við Báru M. Gásadal, starvsfólkastjóra, á bmg@ft.fo ella tel. 24 30 06.  Fyrispurningar og umsóknir verða viðgjørd í trúnaði. 

Um Føroya Tele-samtakið

Føroya Tele er ein tøkniliga framkomin fyritøka, ið veitir samskiftistænastur. Aðalmálið er at veita álítandi og trygt fjarskifti til øll. Umframt móðurfelagið fevnir samtakið um dótturfeløgini FT Samskifti, NET, Shefa og Televarpið. Fleiri enn 200 fólk starvast í samtakinum, og fjølbroyttir førleikar eyðmerkja starvshópin.

Ert tú royndi KT-mennarin, vit leita eftir? Hevur tú áræðið og førleikarnar at ganga á odda fyri nýmenning av KT-skipanum? Og vilt tú arbeiða í umhvørvi, sum leggur stóran dent á fakliga menning, samanhald og sparring? So hava vit starvið til tín.

Hví arbeiða hjá okkum?

Sum leiðandi KT-mennari verður tú partur av deildini Menning, sum hevur um hendi forritan og viðlíkahald av øllum innanhýsismentum skipanum, sambindingum til og ímillum rakstrarskipanir. Deildin hevur eisini lyklaleiklut í menning av produktum og tænastum eins og at veita support til kundavendu deildirnar.

Á Menning brúka vit open-source pallar, sum t.d. .NET til nýmenning, og vit fylgja DevOps-mannagongdum fyri at tryggja smidligar og góðskutryggjaðar menningartilgongdir. Uppgávurnar, sum deildin mennir, og verkætlanirnar, sum deildin luttekur í, vera gjørdar á nýmótans Kubernetes-infrakervi.

Á deildini leggja vit stóran dent á fakliga menning, samanhald og sparring. Deildin er skipað á agilan hátt við Scrum, sum tryggjar eitt samsvarandi og effektivt arbeiðslag.

Hvat verður tín leiklutur?

Sum KT-mennari verður tín leiklutur at tvinna saman fakligu førleikarnar við tín áhuga at seta teg inn í nýggja tøkni. Tú skalt taka ábyrgd, luttaka í verkætlanararbeiði og samstarva breitt til tess at finna røttu loysnirnar, sum skulu tryggja, at skipanir verða mentar á nýmótans, tøkniligum støði.

Tú skalt hava góðar førleikar í forritan og system design. Tú skalt megna at halda høvdið kalt, hóast nógv hendir samstundis, og tú skalt megna at samstarva og samskifta tvørtur um deildir og faklig mørk.

Vit hugsa, tú hevur lokið KT-útbúgving á kandidat- ella bachelorstøði og hevur ítøkiligar royndir og avrik at vísa á.

Hvussu søkir tú starvið?

Tú søkir starvið her. Umsókn, lívsrensl og avrit av øðrum viðkomandi skjølum skulu vera okkum í hendi í seinasta lagi sunnudagin 8. desember 2024. Setanarviðurskifti og løn vera ásett við støði í viðkomandi sáttmála.

Arbeiðsstaður er í høvuðssætinum í Hoyvík og møguleiki er fyri at skipa arbeiðstíðina fleksibult. Arbeiðið krevur, at tú trívist, har tað til tíðir kann vera nógv at gera.

Vilt tú vita meira?

Tú ert vælkomin at seta teg í samband við Hall Holm Johannessen, deildarleiðara, á 243088 og hhjo@ft.fo, um tú vilt vita meira um starvið. Tú kanst eisini venda tær til Starvsfólkadeildina á 243009  ella sfd@ft.fo.

Sjálvboðin umsókn

Fólkið er hjartaslátturin hjá Føroya Tele Samtakinum, og tí vilja vit altíð frætta frá fólki, sum hava eitt brennandi ynski um at skapa sær eitt navn í fyritøkuni. Skulu vit ganga á odda í føroyska framburðinum, so krevur tað fyrst og fremst dugnalig, nærløgd og nøgd starvsfólk, ið duga at laga seg til ein heim í støðugari broyting. Lat hugin fremja verkið.

Send okkum eina sjálvbodna umsókn, tí so ert tú longu væl á veg. Sjálvbodnar umsóknir kunnu sendast talgilt umvegis hesa síðu .

Tá ið tú sendir okkum eina sjálvbodna umsókn, leggja vit stóran dent á, at umsóknin myndar teg sum tann persónin, tú ert. Minst tí til tann persónliga vinkulin umframt at upplýsa, hvørja útbúgving tú hevur, hvørjar royndir tú hevur, og hvat títt áhugaøki er. Vit gleða okkum at hoyra frá tær.

Við at senda okkum eina sjálvbodna umsókn játtar tú, at vit goyma tínar upplýsingar í 6 mánaðir.